पुणे : देशाचे पहिले पंतप्रधान पं. जवाहरलाल नेहरू यांच्या जयंतीनिमित्त अर्थात बालदिनानिमित्त काँग्रेस पक्षातर्फे पुण्यात विशेष कार्यक्रम आयोजित करण्यात आला होता. कामायनी संस्थेतील मूकबधिर व मतिमंद या विशेष मुलांसोबत जंगली महाराज रोडवरील ‘मॅकडोनाल्ड’मध्ये बालदिन साजरा करण्यात आला.
या वेळी मुलांच्या हातावर टॅटू पेंटिंग करण्यात आले. मुलांचे स्केच काढून देण्यात आले. या विशेष मुलांनी केक कापून पंडितजींच्या नावाच्या घोषणादेखील दिल्या. फ्रेंच फ्राइज, कॅडबरी, केक, आइस्क्रीम आणि बर्गर या खाऊचाही आनंद त्यांनी लुटला. त्यांची आनंदी मुद्रा पाहून सर्वच जण भावुक झाले होते.
या विशेष मुलांसोबत बालदिन साजरे करण्याचे हे पाचवे वर्ष आहे. तसेच गेली २० वर्षे समाजातील आर्थिकदृष्ट्या दुर्बल घटकातील मुलांसोबत बालदिन साजरा करण्यात येतो. पुणे शहर काँग्रेस कमिटीचे सरचिटणीस अमित बागुल यांनी या कार्यक्रमाचे आयोजन केले होते. या प्रसंगी कामायनी संस्थेतील कालिदास सुपाते, श्रीलेखा कुलकर्णी, सागर आरोळे, अभिषेक बागुल, इम्तियाझ तांबोळी, संतोष पवार, गोरख मरळ, सुरेश कांबळे, राजाभाऊ पोळ, महेश ढवळे, बाबासाहेब पोळके, सुधीर सोनावणे, अभिजित गायकवाड, भाऊसाहेब दोडके, मनीषा निंबाळकर आदी उपस्थित होते.
